Tanış vəziyyət: loqo var, amma sayt bir rəngdə, Instagram postları başqa üslubda, vizit kartları üçüncü şriftlə hazırlanıb. Hər yeni dizayner və ya əməkdaş «öz bildiyi kimi» edir və şirkət hər yerdə fərqli görünür. Bunun həlli — brend kitabçasıdır (brandbook, brend bələdçisi).
Brend kitabçası nədir?
Şirkətin vizual və yazılı üslubunun qaydalarını bir yerə toplayan sənəddir. Məqsədi sadədir: kim hazırlayırsa-hazırlasın — dizayner, SMM mütəxəssisi, çapxana — nəticə eyni şirkətə məxsus görünsün.
Nələr daxildir?
- Loqo və istifadə qaydaları — versiyalar, minimal ölçü, ətrafında boş saxlanmalı sahə, hansı fonlarda necə istifadə olunur və necə istifadə olunmamalıdır (dartılmış, rəngi dəyişdirilmiş, kölgəli loqo nümunələri);
- Rəng palitrası — əsas və köməkçi rənglər, ekran üçün HEX/RGB və çap üçün CMYK kodları;
- Tipoqrafiya — başlıq və mətn şriftləri, ölçü nisbətləri;
- Qrafik elementlər — ikon üslubu, naxışlar, fotoşəkil seçimi qaydaları;
- Nümunələr — vizit kartı, blank, e-poçt imzası, sosial şəbəkə postu, sayt başlığı;
- Ton və dil — müştəriyə «siz» yoxsa «sən», rəsmi yoxsa səmimi, hansı ifadələrdən qaçılır.
Kimə lazımdır?
- Bir neçə dizayner və ya agentliklə işləyən şirkətlərə;
- Filialları, franşizası və ya dilerləri olan bizneslərə;
- Sosial şəbəkələri müxtəlif əməkdaşlar aparan komandalara;
- Rebrendinq edən və köhnə materialları yeniləyən şirkətlərə.
Kiçik biznes üçün 30–50 səhifəlik kitabça şart deyil. Loqo qaydaları, rənglər, şriftlər və bir neçə nümunədən ibarət 5–10 səhifəlik «mini-bələdçi» də ziddiyyətlərin çoxunu aradan qaldırır.
Üstünlükləri
- Tanınma. Eyni rəng və üslub təkrarlandıqca müştəri sizi loqoya baxmadan da tanıyır.
- Vaxt və pul qənaəti. Hər yeni material üçün «hansı rəng, hansı şrift» müzakirəsi bitir; yeni dizayner işə tez başlayır.
- Peşəkar görünüş. Ardıcıl üslub şirkətin ciddi və etibarlı olduğunu göstərir.
Sayt və brend kitabçası
Sayt brendin ən çox görülən hissəsidir. Kitabçada rəqəmsal üçün ayrıca qaydalar olması faydalıdır: düymələrin rəngi, mətnlə fon arasındakı kontrast, veb şriftlər və onların Azərbaycan hərflərini (ə, ğ, ı, ö, ü, ç, ş) dəstəkləməsi. Bu barədə ətraflı növbəti yazılarımızda danışacağıq. Loqonun özü ilə bağlı: Yaxşı loqonun 6 əlaməti.
Necə başlamaq olar?
Mövcud bütün materiallarınızı — sayt, kartlar, postlar, reklam — bir yerə yığın və nəyin təkrarlandığına, nəyin ziddiyyət təşkil etdiyinə baxın. Uğurlu elementləri saxlayıb qaydaya çevirmək çox vaxt sıfırdan başlamaqdan daha düzgündür.
Loqo, korporativ üslub və brend kitabçası hazırlanması üçün brendinq xidmətlərimizə baxın.
